ინტერნაციონალიზაციის სტრატეგია

სტაჟირება CHUAC ჰოსპიტალში (ლა კორუნია, ესპანეთი) 2020 წლის ნოემბერში გადამწყვეტი როლი ითამაშა ჩემი პროფესიონალური უნარების დახვეწაში და ახალი პრაქტიკული ცოდნის შეძენაში. როტაციების დროს ვიმყოფებოდი ჰოსპიტალის ფსიქიატრიულ და ნევროლოგიურ განყოფილებებში. მიუხედავად იმისა, რომ როტაცია გავიარე კოვიდ-19 პანდემიის პირობებში, პერსონალის მხარდაჭერამ და ჩართულობამ პროცესის თითოეულ ეტაპზე ხელი შემეწყო ჰოსპიტალის გარემოსთან ინტეგრირებაში. CHUAC ჰოსპიტალში ყოფნის დროს თავი ვიგრძენი გუნდის სრულყოფილ წევრად, ვესწრებოდი ტრენინგებს და სემინარებს. რაც მთავარია, შევისწავლე გალისიის ჯანდაცვის სისტემის თავისებურებები. განსაკუთრებით ღირებულ გამოცდილებად ვთვლი პაციენტებთან პროფესიონალური დამოკიდებულების და ეთიკის მაღალი სტანდარტების დაკვირვება და შესწავლა.

ნიუ-ვიჟენ უნივერსიტეტმა შესაძლებლობა მომცა გავმხდარიყავი ვილდაუ-ს ტექნიკური უნივერსიტეტის სტიპენდიანტი და გაცვლითი პროგრამის ფარგლებში გაზაფხულის სემესტრში სწავლა გამეგრძელებინა გერმანიაში ბიზნესისა და სამართლის სამაგისტრო პროგრამაზე. გაცვლითი პროგრამის ფარგლებში, როგორც ყველა სტუდენტისთვის, ჩემთვისაც ძირითადი გამოწვევა Covid-19-ის გამო შექმნილი პანდემიური სიტუაცია და შესაბამისად, სწავლების დისტანციური ფორმა გახდა. ყველა ლექტორი მაქსიმალურად იყო ჩართული ჩვენთვის მისაღები და ნაყოფიერი სასწავლო გარემოს შექმნაში. დისტანციური სწავლების მეთოდს ხელი არ შეუშლია ლექტრორებთან უშუალო კომუნიკაციაში. ასევე, მომეცა შესაძლებლობა გამეცნო კურსელები და მემუშავა მათთან ერთად. ვილდაუს ტექნიკურ უნივერსიტეტში სწავლამ შესაძლებლობა მომცა გავცნობოდი სწავლების ახალ მეთოდებს, დამემყარებინა ეფექტური კომუნიკაცია ლექტორებსა და სტუდენტებთან, მქონოდა წვდომა ყველა სასწავლო მასალასთან და მიმეღო ხარისხიანი განათლება.

მიხარია, რომ მქონდა შანსი გაზაფხულის სემესტრის განმავლობაში მესწავლა ვილდაუს ტექნიკურ უნივერსიტეტში ბიზნესისა და სამართლის მიმართულებით.  მართალია კორონა ვირუსის გავრცელებამ გეგმები შეგვიცვალა, თუმცა თამამად შემიძლია ვთქვა, რომ დისტანციური სწავლების პროცესი იმდენად ტექნიკურად გამართული და  სტუდენტებზე ორიენტირებული იყო, რომ მე როგორც სტუდენტი, თავს კომფორტულად ვგრძნობდი. ლექტორები მაქსიმალურად ცდილობდნენ დაგვხმარებოდნენ, თავიანთი ცოდნა და პროფესიული უნარ-ჩვევები გაეზიარებინათ ჩვენთვის.  დანამდვილებით შემიძლია ვთქვა, რომ მიღებული ცოდნა და გამოცდილება სამომავლო საქმიანობაში ძალიან გამომადგება.